O Nadal é una celebración que os cativos agardan con ansia. Cando comeza o mes de decembro todas as rúas se iluminan, os comercios decóranse con motivos de Nadal, e tamén o fan así os fogares. Sen dúbida, os rapaces son os que viven con máis ilusión a tempada de Nadal. Pero non todos os rapaces teñen a sorte de poder contar con agasallos e xoguetes nestes días, polo que, o Concello de Ames pon en marcha, por oitavo ano consecutivo, a campaña de recollida de xoguetes. Baixo o lema "¿Déixasme xogar?", a Concellería de Benestar Social e Igualdade pon en marcha unha nova edición desta campaña. A través desta iniciativa, as familias con máis recursos poderán axudar a que, aquelas que non dispoñen de recursos, poidan proporcionarlles aos seus fillos un xoguete nesta época tan especial para todos os cativos. É o oitavo ano consecutivo que a Oficina de Voluntariado de Ames dependente da Concellaría de Benestar Social e Igualdade leva a cabo esta iniciativa. Todas as persoas que queiran colaborar coa campaña deberán depositar os seus xoguetes nas Casas da Cultura do Milladoiro e de Bertamiráns, de 10:00 h. a 14:00 horas e de 17:00 a 21:00 horas. Así mesmo, prégase que os obxectos doados sexan novos ou se atopen en bo estado, e non teñan carácter bélico nin sexista. As persoas interesadas en doar algún xoguete teñen de prazo ata o día 30 de decembro. Finalizado o prazo de entrega, a Oficina Municipal de Voluntariado será a encargada de repartir os xoguetes recollidos nesta campaña entre as familias con menos recursos. Deste xeito, todos os rapaces poderán gozar dun agasallo nun día tan especial e esperado para eles como é o día dos Reis, no que a ilusión e a diversión debe ser o que predomine en todos os nenos e nenas. As persoas que desexen obter máis información deberán dirixirse á Oficina Municipal do Voluntariado (OVA) ao teléfono 981 883 703, ou ben ás Casas da Cultura de Bertamiráns e do Milladoiro.
